UPPFÆRT: Neysluvatn öruggt. Gerlamengun í neysluvatni á Borgarfirði.
Uppfært 08:30 27.ágúst
HAUST tók sýni á þriðjudaginn og standast þau gæðakröfur. Því er öllum kröfum um suðu á neysluvatni aflétt og fólki óhætt að neyta vatnsins sem áður. Áfram verður unnið í vatnsveitu Borgarfjarðar á næstu vikum en vatnsgæði verða áfram trygg og gegnumlýsingartækið í notkun.
Uppfært 08:30 26.ágúst
HAUST tók sýni á amk tveimur stöðum á Borgarfirði í gær og eru sýnin sett af stað í ræktun nú í dag. Búist er við fyrstu niðurstöðum í fyrramálið. Þangað til gilda sömu fyrirmæli um suðu og áður.
Uppfært 08:30 25.ágúst
Lokið var við tengingar og uppsetningu gegnumlýsingartækis á framhjáhlaupi seint í gærkvöldi. Ljóst er að vegna breytinga á tengingum kemur þrýstingur til með að hafa lækkað sumsstaðar í þorpinu. HAUST tekur ný sýni í dag og munu niðurstöður úr því leiða í ljós hvort öruggt er að neyta vatnsins eins og vanalega. Fréttin verður uppfærð síðar í dag en ekki er hægt að ábyrgjast að vatnið sé öruggt til neyslu og áfram þarf að sjóð það til drykkjar.
Uppfært 13:00 21.ágúst
Unnið hefur verið að uppsetningu gegnumlýsingartækis og tengingum við vatnstankinn en ekki tókst að koma því í gagnið fyrir helgi. Á mánudaginn heldur vinna áfram og stefnt á að lýsingartækið komist í gagnið. Samhliða þeirri vinnu verða truflanir á afhendingu á vatni í vatnsveitunni. HAUST stefnir á sýnatöku í kjölfarið.
Upprunaleg frétt 17. ágúst:
Við reglubundið eftirlit Heilbrigðiseftirlits Austurlands á neysluvatni á Borgarfirði eystra í síðustu viku greindust e.coli gerlar í sýninu. Að svo stöddu er ekki ljóst hvað veldur menguninni en talið er að náttúrulegt smit hafi komist í brunna.
Þeim tilmælum er beint til íbúa að sjóða neysluvatn fyrir neyslu. Óhætt er að nota vatnið til annarra þarfa s.s. til baða þar sem fjöldi gerlanna var innan þeirra marka, sem miðað er við að megi vera í baðvatni í náttúrunni.
Leiðiningar um suðu á neysluvatni
Framkvæmdir standa nú yfir á vatnsveitu Borgarfjarðar sem miða einmitt að uppsetningu á gegnumlýsingartæki fyrir vatnsveituna sem ætlað er að koma í veg fyrir mengun sem þessa, en þeim er ekki lokið. Lagt verður kapp á að koma gegnumlýsingartæki í gagnið en ekki er ljóst hvort það næst í vikunni.
Frekari sýnatökur verða gerðar í vikunni og fréttin verður uppfært þegar niðurstöður berast.