Borunum lokið í Borgarfirði
Uppfært 17.10.16 kl 10:00
Fyrir helgi lauk borunum í Borgarfirði en boraðar voru 6 holur, 60 - 150 m djúpar. Ein hola misheppnaðist, en það er holan við sparkhöllina. Hún er full af súrum leir og drullu og ekki er unnt að ná góðri hitamælingu úr henni sökum þess. Ljósgrýti (Rýólít, einnig þekkt sem líparít) einkennti holurnar inni í firði (Desjarmýri, Grund og Jökulsá) en basalt meira áberandi utar (Háhamar, Grafningsgil). Holan við sparkhöllina einkenntist af ljósu og dökku til skiptis en svarfsýni voru tekin úr henni.
Fyrstu mælingar gefa ekki til kynna marktæk frávik eða aukinn hita. Þó eru sumar holurnar nærri því þurrar og þarfnast tíma áður en hægt er að hitamæla þær almennilega.
Athygli vekur að rafleiðni er mjög há í öllum holunum sem hafa verið mældar.
Þessi frétt verður líklega uppfær einu sinni í viðbót þegar almennilegar mælingar hafa náðst, eftir einhverjar vikur.
Uppfært 15.10.16 kl 10:00
Nú er borun fjögurra hola lokið og næst verður farið í borun við sparkhöllina í Bakkagerði. Sú borun hefst á morgun föstudag og stendur yfir um helgina. Þar verður boruð 150 m hola og eftir mælingar kann að vera að hún nýtist fyrir varmadælu ef vel heppnast. Beðist er velvirðingar á ónæðinu á meðan borun stendur.
Borun BOR-04 við Háhamar
Uppfært 12.10.16 kl 15:00
Boranir ganga nú vel eftir strembna byrjun og er þriðju holunni lokið nú í dag. Sú hola var boruð ofan við Grund (60 m). Áður voru holur við Desjarmýri (100 m) og við Jökulsá (90 m) boraðar. Boranir halda áfram í vikunni.
Stefnt er á að bora holu í Bakkagerði innan við sparkhöllina og verður reynt að gera það um helgi, ekki ljóst í dag havað helgi það verður. Íbúar eru beðnir velvirðingar á ónæðinu sem kann að hljótast af því.
Upprunaleg frétt:
Nú í dag eru boranir að hefjast í jarðhitaleitarátaki HEF veitna á Borgarfirði en stefnt er á að bora 5-6 hitastigulsholur í firðinum. Ein hola verður boruð við sparkhöllina í þorpinu og mun það valda einhverri hávaðamengun á meðan því stendur. Reiknað er með að hver hola taki 1-3 daga í borun.
Framgangur verksins ræðst að miklu leita af veðri og vindum og getur óhagstæð vindátt eða bleyta erfiðað verkið.
Fréttin verður uppfærð á næstu dögum og vikum.
